ការជួបជុំគ្រួសារលើកទី២៖ លោកស្រី សុខ ខេង ស្វែងរកឃើញប្អូនស្រី ធម៌ ទិដ្ឋថភាពដ៏គួអោយតក់ស្លុតនៅក្នុងរបរប៉ុលពត បានធ្វើអោយអារម្មណ៍របស់ប្រជាជនកម្ពុជារាប់លាននាក់ នៅតែដក់ជាប់ក្នុងក្រអៅបេះដូង។ ការនិរាសព្រាត់ប្រាស់ ពីឪពុកម្ដាយ សាច់ញាតិ និងបងប្អូនជាទីស្រលាញ់ ធ្វើអោយប្រជាជនជាច្រើននាក់ កំពុងទន្ទឹងរង់ចាំពីការជួបជុំបងប្អូនជាថ្មី ដោយមិនដឹងថាពេលណានឹងត្រូវបានជួបជុំនោះទេ។ កម្មវិធី មនុស្សធម៌ «នេះមិនមែនជាសុបិន» បានបំពេញក្ដីបំណងប្រាថ្នារបស់ប្រជាជនកម្ពុជាដែលបែកបាក់បងប្អូនជាបន្តរបន្ទាប់។ លោកស្រី សុខ ខេង បានស្វែងរកឃើញប្អូនស្រីធម៌ ឈ្មោះ អាន ថន ដោយភាពរំភើប រីករាយ រកអ្វីនិយាយមិនត្រូវ។
លោកស្រី សុខ ខេង មានស្រុកកំណើតនៅ ភូមិព្រែកតាពៅ ឃុំតាខ្មៅ ស្រុកកណ្ដាលស្ទឹង ខេត្តកណ្ដាល។ នៅមុនឆ្នាំ១៩៧៥ លោកស្រី សុខខេង បានទៅលេងក្រុងព្រះសីហនុជាមួយមិត្តភ័ក្ដិ លុះពេលត្រលប់មកវិញស្របពេលដែលប៉ុលពតចូលមកដល់គឺនៅថ្ងៃទី១៧មេសា។ នៅពាក់កណ្ដាលផ្លូវលោកស្រី សុខ ខេង ត្រូវបានពួកប៉ុលពតស្ទាក់ផ្លូវ នៅម្ដុំស្រុកព្រៃនប់ ហើយគាត់ក៏បានរស់នៅទីនោះអស់រយៈពេលបីឆ្នាំ ប្រាំបីខែ ធ្វើជាកងចល័ត ហើយស្របពេលនោះគាត់ក៏បានជួបជាមួយនឹងក្រុមគ្រួសាររបស់លោកស្រី ថន ហើយក៏បានរាប់អានគ្នាជាបងប្អូនធម៌។ នៅឆ្នាំ១៩៧៩ ក្រោយពេលរំដោះ លោកស្រី សុខ ខេង ក៏បានត្រលប់មករកបងប្អូននៅឯស្រុកកំណើតវិញ។ ជាភព្វសំណាងល្អលោកស្រីក៏បានជួបជុំជាមួយក្រុមគ្រួសារនិងរស់នៅដោយភាពកក់ក្ដៅជាថ្មី។ ប៉ុន្តែលោកស្រីបានបែកពីក្រុមគ្រួសារលោកស្រី ថន ដែលត្រូវជាប្អូនស្រីធម៌ រហូតមក។ លោកស្រីក៏បានខិតខំស្វះស្វែងរកប្អូនស្រីធម៌ ថន ដែរ ប៉ុន្តែគ្មានតម្រុយ និង ដំណឹងអ្វីសោះ។ ចុងក្រោយលោកស្រីក៏បានមកដាក់ពាក្យពឹងពាក់កម្មវិធីមនុស្សធម៌ នេះមិនមែនជាសុបិន អោយជួយស្វែងរកប្អូនស្រីធម៌របស់ខ្លួន។
នៅថ្ងៃព្រហស្បត្តិ៍ ទី២៨ ខែតុលា ឆ្នាំ២០១០ ការជួបជុំដ៏អស្ចារ្យនៅក្នុងកម្មវិធីមនុស្សធម៌ «នេះមិនមែនជាសុបិន» បានបង្កើតអោយមានកម្មវិធីជួបជុំមួយសម្រាប់លោកស្រី សុខ ខេង ដែលបានរកឃើញប្អូនស្រីធម៌ ឈ្មោះ ថន។ ការរំភើបចិត្ត និងការនិយាយរៀបរាប់ពីក្ដីនឹករលឹកទាំងអួលដើមករបស់លោកស្រី សុខ ខេង ត្រូវបានបង្ហាញអោយទស្សនិកជនឃើញនៅលើវេទិការក្នុងស្ថានីយ៍ទូរទស្សន៍បាយ័ន។
សូមទស្សនាការជួបជុំរបស់លោកស្រី សុខ ខេង ដូចខាងក្រោម៖