ករណី​លេខ ០៩៥ លោកស្រី ហូ ហុង ស្វែងរក​លោក អ៊ួន វ៉ា លោក អ៊ួន ភា លោកស្រី ខុង ភាវត្តី

83

លោក អ៊ួន វ៉ា មាន​អាយុ ៦០​ឆ្នាំ ​ជា​គ្រូ​បង្រៀន ហើយ​ប្អូន​ទី២​របស់​លោក​ឈ្មោះ អ៊ួន ភា មាន​អាយុ​ប្រហែល​៥៨​ឆ្នាំ។ លោក អ៊ួន វ៉ា ​មាន​ឪពុក​ឈ្មោះ អ៊ួន កាង និង​មាន​បង​ប្អូន​ប្រហែល​​៥ឬ៦នាក់។

លោកស្រី អ៊ួន ណាគី ហៅ កូ ឈាន់ ធ្វើជា​គ្រូបង្រៀន និង​មាន​ស្វាមី​ឈ្មោះ ខុង សេងឈាន់ និង​មាន​កូន​ចំនួន​២​នាក់ កូន​ទី១ ឈ្មោះ ខុង សុភាវត្តី ហៅ​ សុង និង​កូន​ទី២​ឈ្មោះ ខុង សុជាតា ។ ក្រុម​គ្រួសារ​លោក អ៊ួន វ៉ា រស់​នៅ​ម្ដុំ​ផ្លូវ​កម្ពុជា​ក្រោម។

ឆ្នាំ​១៩៧១​ លោក​ស្រី ហូ ហុង បាន​មក​នៅ​ជា​មួយ​ក្រុម​​គ្រួសារ​បង​ថ្លៃ គឺ​លោក​ស្រី អ៊ួន ណាគី ​

ឆ្នាំ១៩៧៣ ​លោក អ៊ួន វ៉ា និង លោក ​អ៊ួន ភា បាន​​ចាក​ចេញ​ទៅ​ក្រៅ​ប្រទេស។

ឆ្នាំ​១៩៧៥ ក្រុម​គ្រួសារ​​លោក​ អ៊ួន វ៉ា និង​លោក​ស្រី ហូ ហុង ត្រូវ​បាន​ពួក​ប៉ុលពត​ជម្លៀស​ចេញ​ពី​ក្រុង​ភ្នំពេញ ឆ្ពោះ​ទៅ​កាន់​ខេត្ត​កំពង់ស្ពឺ ។

ឆ្នាំ១៩៧៩ លោក​ស្រី ហូ ហុង និង​ក្មួយ​ស្រី ខុង ភាវត្តី ហៅ សុង បាន​​មក​នៅ​​ខេត្ត​សៀមរាប​។​ រស់នៅ​ មិន​ទាន់​បាន​ប៉ុន្មាន​ថ្ងៃ​ផង ក្មួយស្រី ខុង សុភាវត្តី បាន​ចេញ​ពី​លោកស្រី ហូ ហុង ​ទៅ​នៅ​ជាមួយ​គេ ដែល​ជា​ជន​ជាតិ​ចិន​កាត់​ខ្មែរ នៅ​ខេត្ត​សៀមរាប។តាំង​ពី​ពេល​នោះ​មក​បាន​បាត់​ដំណឹង​ពី​ពួក​គាត់​រហូត។

​​កម្មវិធី​មនុស្សធម៌ «នេះ​មិនមែន​ជា​សុបិន» សូម​ប្រកាស​ស្វែងរក​លោក អ៊ួន វ៉ា លោក អ៊ួន ភា ដែល​បាន​បែក​គ្នា​នៅ​ក្នុង​ឆ្នាំ​១៩៧៣ និង​លោកស្រី ខុង ភាវត្តី ដែល​បាន​បែកគ្នា​នៅ​ឆ្នាំ​១៩៧៩ ប្រសិន​បើ​​លោក អ៊ួន វ៉ា លោក អ៊ួន ភា និង​លោកស្រី ខុង ភាវត្តី បាន​​ឃើញ​​​​ការ​ប្រកាស​​ស្វែងរក​ ឬ​​លោក​​អ្នក​ដែល​បាន​​ដឹង​ដំណឹង​​​នេះ សូម​ទាក់ទង​​​មក​ កម្មវិធី​មនុស្សធម៌ «នេះ​មិនមែន​ជា​សុបិន» តាម​រយៈ​ទូរស័ព្ទ​លេខ ០៩៧៥ ០៩៧ ០៩៧។

កម្មវិធី​មនុស្សធម៌ «នេះ​មិនមែន​ជា​សុបិន» ផ្ដល់​សេវាកម្ម ឥតគិតថ្លៃ​ជូន​​ប្រជាជន​កម្ពុជា​ក្នុង​ការ​ស្វែងរក​ សាច់ញាតិ ដែល​បាន​បែក​គ្នា​​​ក្នុង​សម័យ​សង្គ្រាម ឬ​បាន​​បែក​គ្នា​ដោយសារ​មូលហេតុ​ផ្សេងៗ​ជាច្រើន​ទៀត ​នៅ​ក្រោយ​​សម័យ​សង្គ្រាម។ សូម​​ទាក់ទង​​មក​​កម្មវិធី​យើងខ្ញុំ​តាម​ទូរស័ព្ទ​លេខ​ ០៩៧៥ ០៩៧ ០៩៧ រៀងរាល់​ម៉ោង​ធ្វើការ​ ចាប់ពី​ថ្ងៃ​ច័ន្ទ​ដល់​ថ្ងៃសុក្រ វេលា​ម៉ោង​៨ដល់១២​ថ្ងៃ​ត្រង់ និង​ម៉ោង​២​ដល់​ម៉ោង​៥​ល្ងាច ឬ​មក​ទាក់ទង​ដោយ​ផ្ទាល់​នៅ​អគ្គនាយកដ្ឋាន​​វិទ្យុ​ និង​​ទូរទស្សន៍​​បាយ័ន៕