លោកស្រី ហុង អេងលី ហៅ កំពឹកសក ស្វែងរកកូនស្រីឈ្មោះ ឡុង មុំ ហៅ អាមុំ
![](https://closer.com.kh/storage/2024/06/Screenshot-2024-06-27-155025-1-750x430.jpg)
កម្មវិធីមនុស្សធម៌ “នេះមិនមែនជាសុបិន“ សូមប្រកាសស្វែងរកលោកស្រី ឡុង មុំ ហៅ អាមុំ ដែលត្រូវជាកូនស្រីរបស់លោកស្រី ហុង អេងលី ហៅ កំពឹកសក ។ លោកស្រី មានឪពុកឈ្មោះ លាង ហម ម្ដាយឈ្មោះ ហ៊ួយ និងមានបងប្អូនចំនួន ៩នាក់ ស្រី ២នាក់ លោកស្រីជាកូនទី៩។នៅមុនឆ្នាំ ១៩៧៥ ក្រុមគ្រួសាររបស់លោកស្រី ហុង អេងលី ហៅ កំពឹសសក រស់នៅផ្ទះទល់មុខរោងកុនគិរីរម្យ ក្រុងភ្នំពេញ ដោយលោកស្រី បើកហាងកាត់ដេរសំលៀកបំពាក់ឈ្មោះ រស្មីនារី ចំណែកស្វាមីរបស់លោកស្រី ធ្វើជាអ្នកភាស៊ីនៅផ្សារធំថ្មី ហើយកូនប្រុសទី១ ឈ្មោះ ឡុង សូវី និងកូនស្រីទី២ ឈ្មោះ ឡុង វណ្ណា រៀននៅសាលាយុគន្ធរ រីឯកូនៗ ផ្សេងៗទៀត រៀននៅសាលាវត្តមហាមន្ត្រី និងជួលគ្រូមកបង្រៀននៅផ្ទះ។ នៅឆ្នាំ ១៩៧៥ ពួក ប៉ុល ពត បានជម្លៀសប្រជាជនចេញពីក្រុងភ្នំពេញទាំងអស់ ហើយក្រុមគ្រួសាររបស់លោកស្រី ត្រូវបានគេជម្លៀសទៅខេត្តកណ្ដាល ដោយធ្វើជាកងចល័ត។ លោកស្រី បានបែកពីកូនឈ្មោះ ឡុង មុំ ហៅ អាមុំ នៅឆ្នាំ ១៩៧៨ ដោយសារពួក ប៉ុល ពត បានបំបែកលោកស្រី ឡុង មុំ ហៅ អាមុំ ឲ្យទៅរស់នៅកងកុមារឆ្ងាយពីឪពុកម្ដាយ។ ចាប់តាំងពីពេលនោះមកលោកស្រី ហុង អេងលី មិនដែលបានដឹងដំណឹងរបស់លោកស្រី ឡុង មុំ ហៅ មុំ រហូតដល់ប្រទេសត្រូវបានរំដោះ។
កម្មវិធីមនុស្សធម៌ “នេះមិនមែនជាសុបិន” សូមប្រកាសស្វែងរកលោកស្រី ឡុង មុំ ហៅ អាមុំ ដែលត្រូវជាកូនស្រីរបស់លោកស្រី ហុង អេងលី ហៅ កំពឹកសក។ ប្រសិនបើ បងប្អូន សាច់ញាតិ ឬអ្នកដែលបានស្គាល់ បានឮដំណឹងប្រកាសនេះ សូមទំនាក់ទំនងមក កម្មវិធីមនុស្សធម៌ “នេះមិនមែនជាសុបិន“ តាម រយៈទូរស័ព្ទលេខ ០៩៧៥ ០៩៧ ០៩៧ ។
កម្មវិធីមនុស្សធម៌ “នេះមិនមែនជាសុបិន“ ផ្ដល់សេវាកម្ម ឥតគិតថ្លៃ សម្រាប់ប្រជាជនកម្ពុជាក្នុងការស្វែងរក សាច់ញាតិ ដែលបានបែកគ្នាក្នុងសម័យសង្គ្រាម ឬបានបែកគ្នា ដោយសារមូលហេតុផ្សេងៗ ជាច្រើនទៀតនៅក្រោយសម័យសង្គ្រាម។ សូមទំនាក់ទំនងមកកម្មវិធីយើងខ្ញុំតាមទូរស័ព្ទលេខ ០៩៧៥ ០៩៧ ០៩៧ រៀងរាល់ម៉ោងធ្វើការចាប់ពីថ្ងៃច័ន្ទដល់ថ្ងៃសុក្រ វេលាម៉ោង៨ដល់១២ព្រឹក និងម៉ោង២ដល់ម៉ោង៥ល្ងាច ឬមកទំនាក់ទំនងដោយផ្ទាល់នៅអគ្គនាយកដ្ឋានវិទ្យុ និងទូរទស្សន៍បាយ័ន។