លោក អ៊ឹង ប៊ុនម៉េង ហៅទ័រហៀ ស្វែងរកឪពុកម្ដាយបងប្អូន
កម្មវិធីមនុស្សធម៌ “នេះមិនមែនជាសុបិន“ សូមប្រកាសស្វែងរកក្រុមគ្រួសាររបស់លោក អ៊ឹង ប៊ុនម៉េង ហៅ ទ័រហៀ។ លោក អ៊ឹង ប៊ុនម៉េង មានឪពុកឈ្មោះ អ៊ឹង សេងអ៊ីម ម្ដាយឈ្មោះ អ៊ឹង អៃជួង និងមានបងប្អូនចំនួន៧នាក់ (ស្រី៤នាក់ ប្រុស៣នាក់)។ មុនឆ្នាំ១៩៧៥ គ្រួសាររបស់លោករស់នៅជុំគ្នានៅម្ដុំផ្សារអូរឫស្សី ក្រុងភ្នំពេញ។ ពេលនោះឪពុករបស់លោក ធ្វើជាប៉េអិម ហើយម្ដាយជាមេផ្ទះ។ ចំណែកបងប្អូនរបស់លោកទាំងអស់រៀននៅសាលាចិន ដែលនៅម្ដុំផ្ទះរបស់លោកដែរ។ ប៉ុន្តែប្អូនស្រីឈ្មោះ អ៊ឹង ប៊ុនហ្គេច (អ្នកបាត់ខ្លួន) នៅតូចមិនទាន់បានចូលរៀននៅឡើយទេ។នៅថ្ងៃ១៤មេសា ក្នុងពេលចូលឆ្នាំនោះ ពួកខ្មែរក្រហមបានចូលមកកាន់កាប់ទីក្រុងភ្នំពេញ និងបានជម្លៀសគ្រួសាររបស់លោកទៅនៅ ខេត្តកំពង់ស្ពឺ។ ពេលនោះគេឲ្យលោកនិងគ្រួសារ ធ្វើស្រែចម្ការ។ នៅឆ្នាំ១៩៧៧ ពួកប៉ុលពតបានយកឪពុករបស់លោកទៅនៅភូមិបាត់ដឹង ខេត្តកំពង់ស្ពឺ ដោយប្រាប់ថាឲ្យទៅជួយធ្វើការនៅទីនោះ។ ហើយតាំងពីពេលនោះមកលោក លែងបានលឺដំណឹងអ្វីសោះពីឪពុករបស់លោក។ នៅឆ្នាំ១៩៧៨ ម្ដាយរបស់លោកត្រូវពួកប៉ុលពតបានចុចឈ្មោះ ម្ដាយរបស់លោកជាមួយប្អូនស្រី អ៊ឹង ប៊ុនហ្គេច ដោយប្រាប់ថាឲ្យទៅកាច់ពោតនៅភូមិបាក់ត្រាង ខេត្តពោធិ៍សាត់ ដែលមានចម្ងាយមិនឆ្ងាយពីកន្លែងរបស់លោករស់នៅនោះទេ។ តាំងពីពេលនោះលោកក៏បានបែកពីអ្នកម្ដាយជាទីស្រឡាញ់និងប្អូនស្រី អ៊ឹង ប៊ុនហ្គេច រហូតមក។
កម្មវិធីមនុស្សធម៌ “នេះមិនមែនជាសុបិន” សូមប្រកាសស្វែងរកក្រុមគ្រួសាររបស់លោក អ៊ឹង ប៊ុនម៉េង។ ប្រសិនបើ បងប្អូន សាច់ញាតិ ឬអ្នកដែលបានស្គាល់ បានឮដំណឹងប្រកាសនេះ សូមទំនាក់ទំនងមក កម្មវិធីមនុស្សធម៌ “នេះមិនមែនជាសុបិន“ តាម រយៈទូរស័ព្ទលេខ ០៩៧៥ ០៩៧ ០៩៧ ។
កម្មវិធីមនុស្សធម៌ “នេះមិនមែនជាសុបិន“ ផ្ដល់សេវាកម្ម ឥតគិតថ្លៃ សម្រាប់ប្រជាជនកម្ពុជាក្នុងការស្វែងរក សាច់ញាតិ ដែលបានបែកគ្នាក្នុងសម័យសង្គ្រាម ឬបានបែកគ្នា ដោយសារមូលហេតុផ្សេងៗ ជាច្រើនទៀតនៅក្រោយសម័យសង្គ្រាម។ សូមទំនាក់ទំនងមកកម្មវិធីយើងខ្ញុំតាមទូរស័ព្ទលេខ ០៩៧៥ ០៩៧ ០៩៧ រៀងរាល់ម៉ោងធ្វើការចាប់ពីថ្ងៃច័ន្ទដល់ថ្ងៃសុក្រ វេលាម៉ោង៨ដល់១២ព្រឹក និងម៉ោង២ដល់ម៉ោង៥ល្ងាច ឬមកទំនាក់ទំនងដោយផ្ទាល់នៅអគ្គនាយកដ្ឋានវិទ្យុ និងទូរទស្សន៍បាយ័ន។