លោកស្រី រ៉ា ហៅ ហែម ប៊ុនខា រស់នៅខេត្តពោធិ៍សាត់ស្វែងរកគ្រួសារ
កម្មវិធីមនុស្សធម៌ “នេះមិនមែនជាសុបិន“ សូមប្រកាសស្វែងរកលោកតា ខេង លោកយាយ សាន់ លោកស្រី រី លោក រិទ្ធ ដែលត្រូវជាឪពុកម្ដាយបងស្រី បងប្រុស របស់លោកស្រី រ៉ា។ មុនឆ្នាំ១៩៧៥ ក្រុមគ្រួសាររបស់លោកស្រី រស់នៅខេត្តស្វាយរៀង ឪពុកលោកស្រីធ្វើជាជាងផ្ទះ ចំណែកម្ដាយធ្វើស្រែចម្ការ ។ ឆ្នាំ ១៩៧៥ គ្រួសាររបស់លោកស្រី រ៉ា មិនត្រូវបានប៉ុលពតជម្លៀសទៅណាទេ គឺរស់នៅភូមិដដែល។ ប៉ុន្តែលោកស្រីចាំបានថា លោកស្រី និងបងប្រុសឈ្មោះ រិទ្ធ គេឲ្យទៅរស់នៅឆ្ងាយពីផ្ទះ នឹងបែកពីម្ដាយឪពុក ហើយទើបបានបែកពីពួកលោកតាំងពីពេលនោះមក ។ ឆ្នាំ១៩៧៨ ពួកប៉ុលពត បានជម្លៀសលោកស្រីរួមជាមួយនឹងបង រិទ្ធ ទៅរស់នៅសហករណ៍តាឡូ ដែលស្ថិតនៅក្នុងស្រុកភ្នំក្រវាញ ខេត្តពោធិ៍សាត់ ដដែល ។ ក្រោយមកប្រហែលចុងឆ្នាំ ១៩៧៨ លោកស្រី រ៉ា មានជំងឺគ្រុនក្ដៅធ្ងន់ធ្ងរ ហើយពេលនោះ គេបានបញ្ជូនលោកស្រីតាមរទេះគោ ទៅព្យាបាលនៅមន្ទីរពេទ្យមួយហើយមន្ទីរពេទ្យនោះស្ថិតនៅឆ្ងាយគួរសមពីសហករណ៍តាឡូ ។ លោកស្រី ក៏បានបែកពីបងប្រុស រិទ្ធ តាំងពីពេលនោះមក រហូតដល់សព្វថ្ងៃ។
កម្មវិធីមនុស្សធម៌ “នេះមិនមែនជាសុបិន” សូមប្រកាសស្វែងរកលោកតា ខេង លោកយាយ សាន់ លោកស្រី រី លោក រិទ្ធ ដែលត្រូវជាឪពុកម្ដាយបងស្រី បងប្រុស របស់លោកស្រី រ៉ា។ ប្រសិនបើបងប្អូន សាច់ញាតិ ឬអ្នកដែលបានស្គាល់ បានឮដំណឹងប្រកាសនេះ សូមទំនាក់ទំនងមក កម្មវិធីមនុស្សធម៌ “នេះមិនមែនជាសុបិន“ តាម រយៈទូរស័ព្ទលេខ ០៩៧៥ ០៩៧ ០៩៧ ។
កម្មវិធីមនុស្សធម៌ “នេះមិនមែនជាសុបិន“ ផ្ដល់សេវាកម្ម ឥតគិតថ្លៃ សម្រាប់ប្រជាជនកម្ពុជាក្នុងការស្វែងរក សាច់ញាតិ ដែលបានបែកគ្នាក្នុងសម័យសង្គ្រាម ឬបានបែកគ្នា ដោយសារមូលហេតុផ្សេងៗ ជាច្រើនទៀតនៅក្រោយសម័យសង្គ្រាម។ សូមទំនាក់ទំនងមកកម្មវិធីយើងខ្ញុំតាមទូរស័ព្ទលេខ ០៩៧៥ ០៩៧ ០៩៧ ឬមកទំនាក់ទំនងដោយផ្ទាល់នៅអគ្គនាយកដ្ឋានវិទ្យុ និងទូរទស្សន៍បាយ័ន។