លោកស្រី អ៊ុង យ៉េង ហៅ ឌួង អ៊ុក ស្វែងរកឈ្មោះ អ៊ុង នាង ត្រូវជាប្អូនស្រីបង្កើត
កម្មវិធីមនុស្សធម៌ “នេះមិនមែនជាសុបិន“ សូមប្រកាសស្វែងរកលោកស្រី អ៊ុង នាង ដែលត្រូវជាប្អូនស្រីរបស់លោកស្រី អ៊ុង យ៉េង ហៅ ឌួង អ៊ុក ។ លោកស្រី មានឪពុកឈ្មោះ អ៊ុង គង់ ម្ដាយឈ្មោះ គល់ ញ៉ឹម និងមានបងប្អូន៩នាក់ ទី១ឈ្មោះ អ៊ុង ស៊ុគ ទី២ឈ្មោះ អ៊ុង ស៊ី ទី៣ឈ្មោះ អ៊ុង យ៉េង ទី៤ឈ្មោះ អ៊ុង គីវ ទី៥ឈ្មោះ អ៊ុង គី ទី៦ឈ្មោះ អ៊ុង ជាតិ ទី៧ឈ្មោះ អ៊ុង ជៀច ទី៨ឈ្មោះ អ៊ុង គៀម ទី៩ឈ្មោះ អ៊ុង នាង ។ ឆ្នាំ១៩៧៥ ក្នុងរបបកម្ពុជាប្រជាធិបតេយ្យ ក្រុមគ្រួសាររបស់លោកស្រី ដែលកំពុងរស់នៅម្ដុំបឹងត្របែក ត្រូវបានគេបញ្ជូនឲ្យទៅរស់នៅម្ដុំស្ដារអូឡាំពិក។ ស្នាក់នៅទីនោះបាន១យប់ គេចាប់ផ្ដើមឲ្យក្រុមគ្រួសាររបស់គាត់ ចាកចេញពីក្រុងភ្នំពេញ។ ឆ្នាំ១៩៧៧ ខ្មែរក្រហម បានចាត់តាំងលោកស្រី យ៉េង ឲ្យនៅធ្វើការក្នុងមូលដ្ឋាន(ក្នុងភូមិ) ចំណែកប្អូនស្រីរបស់លោកស្រី ឈ្មោះ អ៊ុង នាង ត្រូវបានគេឲ្យចូលក្នុងកងចល័ត។ ចុងឆ្នាំ១៩៧៨ ក្រុមគ្រួសាររបស់លោកស្រី យ៉េង ត្រូវបានគេផ្លាស់ឲ្យទៅរស់នៅក្នុងខេត្តពោធិ៍សាត់។ ឆ្នាំ១៩៧៩ ពេលដែលប្រទេសកំពុងវឹកវរ លោកស្រី យ៉េង បានរត់ភៀសខ្លួនជាមួយនឹងម្ដាយ និងលោកស្រី អ៊ុង ស៊ុគ រត់ទៅខាងស្រុកមោងឬស្សី ខេត្តបាត់ដំបងវិញ។ ពេលនោះ លោកស្រី អ៊ុង យ៉េង បានបែកគ្នាជាមួយនឹងលោកស្រី អ៊ុង នាង ដោយសារតែពេលជ្រួលច្របល់នោះ ។ ចាប់តាំងពីពេលនោះមក ក៏បាត់ដំណឹងរបស់លោកស្រី អ៊ុង នាង រហូតមកដល់សព្វថ្ងៃ។
កម្មវិធីមនុស្សធម៌ “នេះមិនមែនជាសុបិន” សូមប្រកាសស្វែងរកលោកស្រី អ៊ុង នាង ដែលត្រូវជាប្អូនស្រីរបស់លោកស្រី អ៊ុង យ៉េង ហៅ ឌួង អ៊ុក ។ ប្រសិនបើបងប្អូន សាច់ញាតិ ឬអ្នកដែលបានស្គាល់ បានឮដំណឹងប្រកាសនេះ សូមទំនាក់ទំនងមក កម្មវិធីមនុស្សធម៌ “នេះមិនមែនជាសុបិន“ តាម រយៈទូរស័ព្ទលេខ ០៩៧៥ ០៩៧ ០៩៧ ។
កម្មវិធីមនុស្សធម៌ “នេះមិនមែនជាសុបិន“ ផ្ដល់សេវាកម្ម ឥតគិតថ្លៃ សម្រាប់ប្រជាជនកម្ពុជាក្នុងការស្វែងរក សាច់ញាតិ ដែលបានបែកគ្នាក្នុងសម័យសង្គ្រាម ឬបានបែកគ្នា ដោយសារមូលហេតុផ្សេងៗ ជាច្រើនទៀតនៅក្រោយសម័យសង្គ្រាម។ សូមទំនាក់ទំនងមកកម្មវិធីយើងខ្ញុំតាមទូរស័ព្ទលេខ ០៩៧៥ ០៩៧ ០៩៧ ឬមកទំនាក់ទំនងដោយផ្ទាល់នៅអគ្គនាយកដ្ឋានវិទ្យុ និងទូរទស្សន៍បាយ័ន។