លោកស្រី នុត វ៉ាន់ ស្វែងរកលោកស្រី គាត ស៊ិវណាយ និងលោកស្រី គាត ស៊ីវជីន ត្រូវជាកូនស្រីបង្កើត
កម្មវិធីមនុស្សធម៌ “នេះមិនមែនជាសុបិន“ សូមប្រកាសស្វែងរកលោកស្រី គាត ស៊ីវណាយ លោកស្រី គាត ស៊ីវជីន ដែលត្រូវជាកូនស្រីបង្កើតរបស់លោកស្រី នុត វ៉ាន់។ លោកស្រី មានស្វាមីឈ្មោះ គាត សេង និងមានកូនបង្កើតចំនួន៧នាក់ ទី១ លោកស្រី គាត ស៊ីវណាយ ទី២ លោកស្រី គាត ស៊ីវជីន ទី៣ លោកស្រី គាត ស៊ីវទៀន ហៅ ហែម រ៉ាឌី ទី៤ លោកស្រី គាត ស៊ីវងិន ហៅ សេង និមល ទី៥ លោក គាត ហ៊ូច ទី៦ លោក គាត ស៊ីវណា ហៅ អាឡោក ទី៧ លោក គាត អ៊ិត ។ មុនឆ្នាំ១៩៧៣ ក្រុមគ្រួសាររបស់លោកស្រី នុត វ៉ាន់ រស់នៅក្នុងខេត្តកំពត។ ពេលនោះ លោកស្រី និងស្វាមី ប្រកបរបរ ធ្វើស្រែ និងធ្វើស្ដរត្នោត។ រីឯកូនស្រីទី២ បានរៀបការរួចហើយ ដែលមានស្វាមីឈ្មោះ អេត ងួន ធ្វើជាប៉េអឹមនៅក្រុងកំពង់សោម។ លោកស្រី បានបាត់ពីកូនស្រីទី២ ដោយសារតែ លោកស្រី ព្រមទាំងកូនទាំង៦ បានផ្លាស់មករស់នៅភ្នំពេញ ព្រោះស្វាមីលោកស្រីប្ដូរការងារមកភ្នំពេញ ។ ចុងឆ្នាំ១៩៧៥ កងនារីរបស់លោកស្រី គាត ស៊ីវណាយ ត្រូវបានអង្គការខ្មែរក្រហមបញ្ជូនឲ្យទៅធ្វើការច្រូតស្រូវនៅឯខេត្តបាត់ដំបង។ ចាប់តាំងពីពេលនោះមក ក៏បាត់ដំណឹងពីកូនស្រីទាំង២ គឺ គាត ស៊ីវណាយ និង គាត ស៊ីវជីន រហូតមកដល់សព្វថ្ងៃ។
កម្មវិធីមនុស្សធម៌ “នេះមិនមែនជាសុបិន” សូមប្រកាសស្វែងរកលោកស្រី គាត ស៊ីវណាយ លោកស្រី គាត ស៊ីវជីន ដែលត្រូវជាកូនស្រីបង្កើតរបស់លោកស្រី នុត វ៉ាន់។ ប្រសិនបើកូនៗទាំងពីរ សាច់ញាតិ ឬអ្នកដែលបានស្គាល់ បានឮដំណឹងប្រកាសនេះ សូមទំនាក់ទំនងមក កម្មវិធីមនុស្សធម៌ “នេះមិនមែនជាសុបិន“ តាម រយៈទូរស័ព្ទលេខ ០៩៧៥ ០៩៧ ០៩៧ ។
កម្មវិធីមនុស្សធម៌ “នេះមិនមែនជាសុបិន“ ផ្ដល់សេវាកម្ម ឥតគិតថ្លៃ សម្រាប់ប្រជាជនកម្ពុជាក្នុងការស្វែងរក សាច់ញាតិ ដែលបានបែកគ្នាក្នុងសម័យសង្គ្រាម ឬបានបែកគ្នា ដោយសារមូលហេតុផ្សេងៗ ជាច្រើនទៀតនៅក្រោយសម័យសង្គ្រាម។ សូមទំនាក់ទំនងមកកម្មវិធីយើងខ្ញុំតាមទូរស័ព្ទលេខ ០៩៧៥ ០៩៧ ០៩៧ ឬមកទំនាក់ទំនងដោយផ្ទាល់នៅអគ្គនាយកដ្ឋានវិទ្យុ និងទូរទស្សន៍បាយ័ន។