លោកស្រី ញ៉ៅ ម៉ៅ ហៅ ពៅ សារ៉ែម ស្វែងរកប្អូនប្រុសឈ្មោះ ញ៉ៅ សុភ័ណ្ឌ និងប្អូនស្រី២នាក់ឈ្មោះ ញ៉ៅ សុភា និង ញ៉ៅ សុភាស់
កម្មវិធីមនុស្សធម៌ “នេះមិនមែនជាសុបិន“ សូមប្រកាសស្វែងរកលោកស្រី ញ៉ៅ សុភ័ណ្ឌ លោក ញ៉ៅ សុភា និង លោកស្រី ញ៉ៅ សុភាស់ ដែលត្រូវជាបងប្អូនប្រុសស្រី របស់លោកស្រី ញ៉ៅ ម៉ៅ ហៅ ពៅ សារ៉ែម ។ លោកស្រី មានឪពុកឈ្មោះ សៅ និងម្ដាយឈ្មោះញ៉ៅ សារឹម និងមានបងប្អូនចំនួន៥នាក់ ទី១ ញ៉ៅ ចក់ ហៅ លី ទី២ ញ៉ៅ ម៉ៅ ហៅ ពៅ សារ៉ែម ទី៣ ញ៉ៅ សុភ័ណ ទី៤ ញ៉ៅ សុភា និងទី៥ ញ៉ៅ សុភាស់។ មុនឆ្នាំ១៩៧៤ គ្រួសាររបស់លោកស្រី រស់នៅជុំគ្នានៅសង្កាត់លេខ១១ ខណ្ឌចំការមន ក្រុងភ្នំពេញ ដោយឪពុករបស់លោកស្រីធ្វើជាជាងសំណង់ ចំណែកម្ដាយរបស់លោកស្រីដាំដំណាំ នៅទល់មុខកោះដុះ។ ពេលនោះលោកស្រីបានរៀននៅវិទ្យាល័យពញ៉ាហុក ជិតផ្សារបឹងកេងកង។ ថ្ងៃ១៧ មេសា ឆ្នាំ១៩៧៥ ប៉ុលពតបានជម្លៀសប្រជាជនចេញពីភ្នំពេញ។ ពេលនោះ គេបានជម្លៀសឪពុកម្ដាយ និងប្អូនៗលោកស្រី ទៅរស់នៅបឹងគ្រុំ ដែលស្ថិតនៅក្នុងខេត្តកណ្ដាល ចំណែកលោកស្រីត្រូវបានជម្លៀសទៅរស់នៅខាងស្រុកកំណើតស្វាមីឯភូមិស្វាយ ស្រុកពារាំង ខេត្តព្រៃវែង។ ក្រោយមកដោយមានការលំបាកវេទនាពេក ឪពុកលោកស្រី ក៏សម្រេចចិត្តនាំម្ដាយនិងប្អូនៗលោកស្រីបណ្ដែតទូកតាមទឹកទៅប្រទេសវៀតណាម។ តែក្រោយមក បងប្រុសឈ្មោះ ញ៉ៅ ចក់ ហៅ លី បានជួបជាមួយម្ដាយតាមបណ្ដោយមាត់ទន្លេ (មិនចាំឈ្មោះទីតាំង) ហើយម្ដាយបានប្រាប់ថាពួកគាត់បានជិះទូកទៅវៀតណាមមិនទាន់ដល់គោលដៅទេ ក៏ត្រូវពួកប៉ុលពត បានចាប់បាន និងបានសម្លាប់ឪពុកចោល ទុកតែម្ដាយនិងប្អូនៗ (ដែលបាត់ខ្លួន) បញ្ជូនមកស្រុកខ្មែរវិញ។ ម្ដាយលោកស្រីបានឲ្យប្អូនៗលោកស្រីទៅឲ្យគេ (មិនដឹងជាអ្នកណាទេ) ពេលម្ដាយលោកស្រីដើរតាមមាត់ទន្លេនោះ។ ហើយតាំងពីពេលនោះលោកស្រីមិនដែលលឺដំណឹងអ្វីសោះពីប្អូនៗលោកស្រី។
កម្មវិធីមនុស្សធម៌ “នេះមិនមែនជាសុបិន” សូមប្រកាសស្វែងរកលោក ឈុន ផល្លី ហៅ វ៉ា ដែលត្រូវជាប្អូនប្រុសបង្កើតរបស់លោកស្រី ឈុន សុខា ។ ប្រសិនបើបងប្អូន សាច់ញាតិ ឬអ្នកដែលបានស្គាល់ បានឮដំណឹងប្រកាសនេះ សូមទំនាក់ទំនងមក កម្មវិធីមនុស្សធម៌ “នេះមិនមែនជាសុបិន“ តាម រយៈទូរស័ព្ទលេខ ០៩៧៥ ០៩៧ ០៩៧ ។
កម្មវិធីមនុស្សធម៌ “នេះមិនមែនជាសុបិន“ ផ្ដល់សេវាកម្ម ឥតគិតថ្លៃ សម្រាប់ប្រជាជនកម្ពុជាក្នុងការស្វែងរក សាច់ញាតិ ដែលបានបែកគ្នាក្នុងសម័យសង្គ្រាម ឬបានបែកគ្នា ដោយសារមូលហេតុផ្សេងៗ ជាច្រើនទៀតនៅក្រោយសម័យសង្គ្រាម។ សូមទំនាក់ទំនងមកកម្មវិធីយើងខ្ញុំតាមទូរស័ព្ទលេខ ០៩៧៥ ០៩៧ ០៩៧ ឬមកទំនាក់ទំនងដោយផ្ទាល់នៅអគ្គនាយកដ្ឋានវិទ្យុ និងទូរទស្សន៍បាយ័ន។