លោក អ៊ុក ប្រមូតអិសារ៉ា ហៅ ពៅ ស្វែងរកបងស្រីបង្កើតឈ្មោះ អ៊ុក សាវត្តីអិសារ៉ា ហៅស្រីណាំង
កម្មវិធីមនុស្សធម៌ “នេះមិនមែនជាសុបិន“ សូមប្រកាសស្វែងរកលោកស្រី អ៊ុក សាវត្តីអិសារ៉សា ហៅ ស្រីណាំង ដែលត្រូវជាបងស្រីរបស់លោក អ៊ុក ប្រមូតអិសារ៉ា ។ លោកមានឪពុកឈ្មោះ អ៊ុក ប៉ាក់ ម្ដាយឈ្មោះ នាង វ៉ា និងមានបងប្អូនចំនួន ៧នាក់៖ ទី១ អ៊ុក សារ៉ា ហៅ ម៉ាំង ទី២ អ៊ុក ប្រមុខអិសារ៉ា ហៅ ម៉ុក ទី៣ អ៊ុក សាវត្ដីអិសារ៉ា ហៅ ស្រីណាំង ទី៤ សយ មាន ជាកូនចិញ្ចឹម ទី៥ អ៊ុក ម៉ារីអិសារ៉ា ហៅ ស្រីណុក ទី៦ អ៊ុក ប្រាយ្យាអិសារ៉ា ហៅ តត ទី៧ អ៊ុក ប្រមូតអិសារ៉ា ហៅ ពៅ ។ កាលពីជំនាន់លន់នល់ គ្រួសាររបស់លោក អ៊ុក ប្រមូតអិសារ៉ា ហៅ ពៅ រស់នៅជុំគ្នានៅក្នុងខេត្តក្រចេះ។ ឪពុករបស់លោក ធ្វើជាទាហានបារាំងតាំងពីសង្គមចាស់។ លោកបានចាំថា មានពេលមួយ ឪពុករបស់លោកបានទៅប្រយុទ្ធគ្នានៅព្រៃនគ ហើយនៅក្នុងពេលប្រយុទ្ធគ្នានោះ ឪពុករបស់លោកបានត្រូវរបួសចំស្មា។ក្រោយមក នៅឆ្នាំ១៩៧៣–១៩៧៤ បងប្រុសរបស់លោក អ៊ុក ប្រមូតអិសារ៉ា ពីរនាក់ និងបងស្រីរបស់លោកឈ្មោះ អ៊ុក សាវត្តីអិសារ៉ា ត្រូវបានឪពុករបស់លោកអោយទៅរៀនបន្តនៅភ្នំពេញ ដោយស្នាក់នៅជាមួយនឹងអ៊ំប្រុសរបស់លោកឈ្មោះ អ៊ុក ប៉ានអិសារ៉ា។ បន្ទាប់មក បងប្រុសទាំង២នាក់របស់លោក អ៊ុក ប្រមូតអិសារ៉ា បានត្រឡប់មកលេងស្រុកកំណើតវិញ ប៉ុន្តែបងស្រីរបស់លោកមិនបានមកជាមួយទេ។ ក្រោយពីបានមកលេងផ្ទះមក បងប្រុសរបស់លោក អ៊ុក ប្រមូតអិសារ៉ា ទាំងពីរមិនបានត្រឡប់ទៅរៀននៅភ្នំពេញវិញទេ ព្រោះនៅពេលនោះមានការទម្លាក់គ្រាប់បែក ហើយដាច់ផ្លូវមិនអាចនិងធ្វើដំណើរទៅបាន។ នៅឆ្នាំ១៩៧៩ លោកបានត្រឡប់ទៅរកបងស្រីនៅផ្ទះដែលបងរបស់លោកធ្លាប់រស់នៅដែរ ប៉ុន្តែលោកឃើញមានអ្នកផ្សេងមករស់នៅ។ចាប់តាំងពីពេលនោះមកលោកក៏មិនបានលឺដំណឹងអ្វីពីបងស្រីរបស់លោកទៀតដែរ។
កម្មវិធីមនុស្សធម៌ “នេះមិនមែនជាសុបិន” សូមប្រកាសស្វែងរកលោកស្រី អ៊ុក សាវត្តីអិសារ៉សា ហៅ ស្រីណាំង ដែលត្រូវជាបងស្រីរបស់លោក អ៊ុក ប្រមូតអិសារ៉ា។ ប្រសិនបើបងប្អូន សាច់ញាតិ ឬអ្នកដែលបានស្គាល់ បានឮដំណឹងប្រកាសនេះ សូមទំនាក់ទំនងមក កម្មវិធីមនុស្សធម៌ “នេះមិនមែនជាសុបិន“ តាម រយៈទូរស័ព្ទលេខ ០៩៧៥ ០៩៧ ០៩៧ ។
កម្មវិធីមនុស្សធម៌ “នេះមិនមែនជាសុបិន“ ផ្ដល់សេវាកម្ម ឥតគិតថ្លៃ សម្រាប់ប្រជាជនកម្ពុជាក្នុងការស្វែងរក សាច់ញាតិ ដែលបានបែកគ្នាក្នុងសម័យសង្គ្រាម ឬបានបែកគ្នា ដោយសារមូលហេតុផ្សេងៗ ជាច្រើនទៀតនៅក្រោយសម័យសង្គ្រាម។ សូមទំនាក់ទំនងមកកម្មវិធីយើងខ្ញុំតាមទូរស័ព្ទលេខ ០៩៧៥ ០៩៧ ០៩៧ ឬមកទំនាក់ទំនងដោយផ្ទាល់នៅអគ្គនាយកដ្ឋានវិទ្យុ និងទូរទស្សន៍បាយ័ន។