ករណីលេខ ០៨១ លោក ម៉ឺន ផាន ស្វែងរកបងប្រុសឈ្មោះ ម៉ឺន ផន
លោក ម៉ឺន ផាន អាយុ ៤៨ឆ្នាំ មានស្រុកកំណើតភូមិត្រពាំឈើទាល ឃុំគូស ស្រុកត្រាំកក់ ខេត្តតាកែវ។ លោក មានឪពុកឈ្មោះ សួន ថេង ម្ដាយឈ្មោះ ច័ន្ទ សេម និងបងប្អូន៣នាក់។ បងប្រុសទី១ឈ្មោះ ម៉ឺន ឆុំ បងប្រុសទី២ឈ្មោះ ម៉ឺន ផន លោក ម៉ឺន ផាន ជាកូនទី៣។
ក្រុមគ្រួសារលោក ម៉ឺន ផាន រស់នៅជួបជុំគ្នា ប៉ុន្តែក្រោយពីម្ដាយស្លាប់ទៅ បងប្អូនទាំងបីនាក់ បានរស់នៅបែកគ្នា ព្រោះឪពុកធ្វើជាទាហាន ទើបមិនបាននៅថែរក្សាកូនទាំងបី។ លោក ម៉ឺន ផាន ចាំបានថារូបគាត់នៅជាមួយឈ្មោះ អ៊ំ ឡុង រស់នៅខេត្តពោធិ៍សាត់ ហើយបងប្រុសទី១ ម៉ឺន ឆុំ និងបងប្រុសទី២ ម៉ឺន ផន នៅជាមួយគេនៅឯខេត្តបាត់ដំបងម្នាក់ និងម្នាក់ទៀតនៅឯខេត្តពោធិ៍សាត់។
ឆ្នាំ១៩៧៥ លោក ម៉ឺន ផាន បានចូលធ្វើជាកងកុមារក្នុងសម័យប៉ុលពត។ លោកបានចូលជាកងកុមារបានមួយឆ្នាំ លោកត្រូវបានគេបញ្ជូនទៅធ្វើជាកងឈ្លប របស់ពួកប៉ុលពតរហូតដល់ឆ្នាំ១៩៧៩។ នៅឆ្នាំ១៩៧៩ដដែលនោះ លោកបានជួបជាមួយនិងឪពុក ហើយក៏បានជួបបងទី២ គឺលោក ម៉ឺន ផន នៅភូមិតាឡូ ឃុំតាឡូ ស្រុកបាកាន ខេត្តពោធិ៍សាត់។ លោកក៏បាននាំឪពុក និងបងប្រុសទី២មកនៅភូមិអន្លង់ហាត់ ឃុំផ្ទះព្រៃ ស្រុកសំពៅមាស ខេត្តពោធិ៍សាត់។ អ្នកភូមិនៅភូមិអន្លង់ហាត់នេះ ភាគច្រើនរកស៊ី នៅស្រុកអូរជ្រៅ ហើយបងប្រុសលោក ម៉ឺន ផន ក៏ទៅរកស៊ីនៅអូរជ្រៅដូចអ្នកភូមិដទៃទៀតដែរ។ ទៅរកស៊ីបានបីជើង ស្រាប់តែលោក ម៉ឺន ផន មិនអាចវិលមកវិញបាន ព្រោះគេបិទផ្លូវ ហើយតាំងពីពេលនោះមកបាត់ដំណឹងរហូត។
កម្មវិធីមនុស្សធម៌ «នេះមិនមែនជាសុបិន» សូមប្រកាសស្វែងរកលោក ម៉ឺន ផន ដែលបានបែកគ្នានៅឆ្នាំ១៩៧៩ ។ ប្រសិនបើ លោក ម៉ឺន ផន បានឃើញការប្រកាសស្វែងរក ឬលោកអ្នកដែលបានដឹងដំណឹងនេះ សូមទាក់ទងមក កម្មវិធីមនុស្សធម៌ «នេះមិនមែនជាសុបិន» តាមរយៈទូរស័ព្ទលេខ ០៩៧៥ ០៩៧ ០៩៧។
កម្មវិធីមនុស្សធម៌ «នេះមិនមែនជាសុបិន» ផ្ដល់សេវាកម្ម ឥតគិតថ្លៃជូនប្រជាជនកម្ពុជាក្នុងការស្វែងរក សាច់ញាតិ ដែលបានបែកគ្នាក្នុងសម័យសង្គ្រាម ឬបានបែកគ្នាដោយសារមូលហេតុផ្សេងៗជាច្រើនទៀត នៅក្រោយសម័យសង្គ្រាម។ សូមទាក់ទងមកកម្មវិធីយើងខ្ញុំតាមទូរស័ព្ទលេខ ០៩៧៥ ០៩៧ ០៩៧ រៀងរាល់ម៉ោងធ្វើការ ចាប់ពីថ្ងៃច័ន្ទដល់ថ្ងៃសុក្រ វេលាម៉ោង៨ដល់១២ថ្ងៃត្រង់ និងម៉ោង២ដល់ម៉ោង៥ល្ងាច ឬមកទាក់ទងដោយផ្ទាល់នៅអគ្គនាយកដ្ឋានវិទ្យុ និងទូរទស្សន៍បាយ័ន៕