លោកស្រី ស៊ឹម បុប្ផារ័ត្ន មានលោកឪពុកឈ្មោះ រស់ សារ៉ន អ្នកម្ដាយឈ្មោះ នេត បូរិន និងបងប្អូនចំនួន២នាក់ គឺបងប្រុសទី១ឈ្មោះ ស៊ឹម សុវត្តិតារា ហៅនឹម និងលោកស្រី ស៊ឹម បុប្ផារ័ត្ន ជាកូនស្រីទី២។ មុនឆ្នាំ១៩៦៨ គ្រួសារលោកស្រី ស៊ឹម បុប្ផារ័ត្នរស់នៅសង្កាត់បឹងកេងកង ក្រុងភ្នំពេញ។ លោកឪពុកធ្វើជាទាហាននៅបន្ទាយស្រះចក ចំណែកអ្នកម្ដាយជាស្ត្រីមេផ្ទះ។
ឆ្នាំ១៩៦៨ លោកឪពុកត្រូវផ្លាស់ទៅធ្វើជាទាហាននៅខេត្តស្ទឹងត្រែង។ នៅពេលនោះ លោកឪពុកបានយកអ្នកម្ដាយ និងបងប្រុសទី១ឈ្មោះ ស៊ឹម សុវត្តិតារា ហៅនឹម ទៅរស់នៅជាមួយ។ ចំណែកលោកស្រី ស៊ឹម បុប្ផារ័ត្ន នៅពេលនោះទើបតែមានអាយុ១ឆ្នាំប៉ុណ្ណោះ ត្រូវលោកឪពុកអ្នកម្ដាយសម្រេចឲ្យរស់នៅជាមួយជីដូនជីតាខាងអ្នកម្ដាយ ដោយសារតែស្ថានភាពផ្លូវធ្វើដំណើរមានការលំបាក និងគ្រោះថ្នាក់។ ឆ្នាំ១៩៧០ នៅពេលមានរដ្ឋប្រហារកើតឡើង លោកតាលោកយាយបានដឹងដំណឹងថាបន្ទាយដែលលោកឪពុកអ្នកម្ដាយ និងបងប្រុសរស់នៅនោះ ត្រូវវាយបំបែកបាត់ហើយ។ ចាប់តាំងពីពេលនោះមក លោកស្រី ស៊ឹម បុប្ផារ័ត្ន ក៏បានបាត់ដំណឹងពីគ្រួសាររបស់លោកស្រីមិនដែលឃើញមកលេងលោកស្រី នៅភ្នំពេញសោះ។
ក្រុមការងារ នៃកម្មវិធីមនុស្សធម៌ «នេះមិនមែនជាសុបិន» បានស្រាវជ្រាវរកឃើញបងប្រុសទី១ឈ្មោះ រស់ សុវត្តិតារា ដែលកំពុងតែរស់នៅក្នុងខេត្តស្ទឹងត្រែង។
សូមទស្សនាវីដេអូជួបជុំរបស់លោកស្រី ស៊ឹម បុប្ផារ័ត្ន ដូចខាងក្រោម!
