លោកស្រី ពុត ស មានស្វាមីឈ្មោះ ជ័យ សាក់ និងមានកូនចំនួន៧នាក់ គឺកូនស្រីទី១ឈ្មោះ ជ័យ ម៉ាលី កូនប្រុសទី២ឈ្មោះ ជ័យ ចាន់ឌី កូនប្រុសទី៣ឈ្មោះ ជ័យ ចិន្ដា កូនប្រុសទី៤ឈ្មោះ ជ័យ ធី កូនប្រុសទី៥ឈ្មោះ ជ័យ ម៉ៅ កូនប្រុសទី៦ឈ្មោះ ជ័យ សុខ និងកូនស្រីទី៧ឈ្មោះ ជ័យ ស្រីទូច ហៅអូន ។ គ្រួសាររបស់លោកស្រី ពុត ស បានផ្លាស់ពីស្រុកកំណើតទៅរស់នៅម្ដុំផ្សារដើមគរ ក្រុងភ្នំពេញ តាំងពីមុនឆ្នាំ១៩៧៥។
ឆ្នាំ១៩៧៥ ប៉ុលពត បានជម្លៀសគ្រួសារលោកស្រី ពុត ស ទៅភូមិគោកត្រប់។ ចំណែកកូនប្រុសឈ្មោះ ជ័យ ចិន្តា ដែលទើបតែមានអាយុ១០ឆ្នាំ បានសុំទៅជាមួយអនុប្រធានភូមិដើម្បីសុំអង្ករនៅស្រុកសង្កែ។ លុះរសៀលថ្ងៃដដែលនោះអនុប្រធានភូមិបានត្រឡប់មកវិញតែម្នាក់ឯង។ លោក ជ័យ ចិន្តា បានសម្រេចចិត្តបន្តរស់នៅឯស្រុកសង្កែ។ មួយសប្ដាហ៍ក្រោយមកលោកឪពុកបានទៅតាមស្វែងរកកូនប្រុស ប៉ុន្តែមានអ្នកភូមិប្រាប់ថា លោក ជ័យ ចិន្តាត្រូវប៉ុលពតបញ្ជូនទៅខេត្តបាត់ដំបងហើយ។ ចាប់ពីពេលនោះមក លោកស្រី ពុត ស បានបាត់ដំណឹងកូនប្រុស ជ័យ ចិន្តារហូតមក។
ក្រុមការងារ នៃកម្មវិធីមនុស្សធម៌ «នេះមិនមែនជាសុបិន» បានស្រាវជ្រាវរកឃើញកូនប្រុសឈ្មោះ ជ័យ ចិន្តា ដែលកំពុងតែរស់នៅក្នុងភូមិស្រែល្អ ឃុំគោករមៀត ស្រុកថ្មពួក ខេត្តបន្ទាយមានជ័យ។
សូមទស្សនាវីដេអូជួបជុំរបស់លោកស្រី ពុត ស ដូចខាងក្រោម!
