លោកស្រី យូ សុភាព មានលោកឪពុកឈ្មោះ ឡាំ វួនវ៉ាន់ អ្នកម្ដាយឈ្មោះ យ៉ាន់ ហួយ និងមានបងប្អូនចំនួន៦នាក់ គឺបងស្រីទី១ឈ្មោះ យោង សូគិន បងស្រីទី២ឈ្មោះ យោង សូអៀ បងស្រីទី៣ឈ្មោះ លឹម លី លោកស្រី យូ សុភាព ជាកូនស្រីទី៤ ប្អូនប្រុសទី៥ឈ្មោះ ឡាំ ម៉េងវណ្ណា និងប្អូនស្រីទី៦ឈ្មោះ លឹម ពៅនារី។ មុនឆ្នាំ១៩៧៥ គ្រួសារលោកស្រី យូ សុភាព រស់នៅជួបជុំគ្នាក្នុងក្រុងភ្នំពេញ។ ចំណែកលោកស្រី យូ សុភាព បានរៀបការ និងបានផ្លាស់ទៅរស់នៅជាមួយគ្រួសារខាងស្វាមីនៅម្ដុំផ្សារអូរឫស្សី។
ឆ្នាំ១៩៧៥ លោកស្រី យូ សុភាព និងគ្រួសារខាងស្វាមីត្រូវជម្លៀសចេញពីភ្នំពេញទៅខេត្តបាត់ដំបង។ ជាការសោកស្ដាយ លោកស្រី យូ សុភាព មិនបានដឹងថា លោកឪពុកអ្នកម្ដាយ និងបងប្អូនផ្សេងទៀត ត្រូវប៉ុលពតជម្លៀសទៅទីណានោះទេ។ នៅឆ្នាំ១៩៧៨ លោកស្រីបានជួបជាមួយលោកស្រីម្នាក់ឈ្មោះ ផាត ដែលជាអ្នកជិតខាងរបស់លោកស្រីពីមុន បានប្រាប់ថា លោកឪពុកអ្នកម្ដាយ និងបងប្អូនរបស់លោកស្រី យូ សុភាពត្រូវជម្លៀសទៅខេត្តពោធិ៍សាត់។
ក្រុមការងារ នៃកម្មវិធីមនុស្សធម៌ «នេះមិនមែនជាសុបិន» បានស្រាវជ្រាវរកឃើញបងស្រីទី១ឈ្មោះ យោង សូគិន បងស្រីទី២ឈ្មោះ យោង សូអៀ និងប្អូនស្រីទី៦ឈ្មោះ លឹម ពៅនារី ដែលកំពុងតែរស់នៅក្នុងខេត្តបន្ទាយមានជ័យ។
សូមទស្សនាវីដេអូជួបជុំរបស់លោកស្រី យូ សុភាព ដូចខាងក្រោម!
