លោក ផល្លី មានលោកឪពុកឈ្មោះ អាត អ្នកម្ដាយឈ្មោះ មុំ និងមានបងប្អូនចំនួន៣នាក់ គឺបងប្រុសទី១ឈ្មោះ ផល្លា លោក ផល្លី ជាកូនប្រុសទី២ និងប្អូនស្រីទី៣មិនចាំឈ្មោះ។ លោក ផល្លាចាំបានថា គ្រួសារលោករស់នៅក្រុងភ្នំពេញ ដោយនៅម្ដុំផ្ទះមានផ្សារ មានរង្វង់មូល និងមានអង់តែនធំមួយ។ លោកផល្លីចាំបានថា លោកតែងតែឃើញម្ដាយដើរទៅផ្សារទិញម្ហូបជារៀងរាល់ថ្ងៃ។ នៅល្ងាចថ្ងៃមួយម្ដាយរបស់លោក ផល្លី បានទៅផ្សារជិតផ្ទះដើម្បីទិញម្ហូបដូចសព្វដង ហើយបានប្រាប់ឲ្យលោក ផល្លី នៅផ្ទះយោលអង្រឹងប្អូន ប៉ុន្តែពេលនោះលោក ផល្លី បានលួចរត់ចេញទៅតាមពីក្រោយម្ដាយទៅផ្សារដែរ។
លោក ផល្លី បានដើរតាមក្រោយម្ដាយរហូតដល់ផ្សារ ហើយម្ដាយបានចូលផ្សារបាត់ទៅ ចំណែកលោក ផល្លី ពេលទៅដល់មុខផ្សារ លោកបម្រុងដើរចូលទៅក្នុងផ្សារតាមរកម្ដាយដែរ ប៉ុន្តែពេលនោះមានប៉ូលិសយាមនៅខាងមុខផ្សារបានឃាត់លោកដើម្បីសាកសួរថាមកពីណាទៅណាតែម្នាក់ឯង។ បន្ទាប់ពីសួរនាំចប់ ប៉ូលិសបានឲ្យលោកចេញទៅរកម្ដាយរបស់លោកវិញ ប៉ុន្តែលោករកម្ដាយរបស់លោកមិនឃើញនោះទេ ដូច្នេះលោក ផល្លី មានបំណងរកផ្លូវត្រលប់ផ្ទះវិញ តែលោកមិនបានចាំផ្លូវត្រលប់មកផ្ទះវិញទេ ហើយលោកក៏ចេះតែដើររហូតដល់វង្វេងផ្លូវត្រលប់មកផ្ទះវិញ។
កម្មវិធីមនុស្សធម៌ «នេះមិនមែនជាសុបិន» បានប្រកាសដំណឹងស្វែងរកគ្រួសាររបស់លោក ផល្លី លើវិទ្យុបាយ័នរយៈពេល១សប្ដាហ៍ ដោយមិនទទួលបានដំណឹងអ្វីសោះ។ ៦ខែក្រោយមក ក្រុមការងារបានសម្រេចប្រកាសដំណឹងស្វែងរកសាច់ញាតិរបស់លោកផល្លីម្ដងទៀតលើវិទ្យុបាយ័ន។ នៅទីបំផុត មានស្ត្រីម្នាក់បានទាក់ទងមកកម្មវិធីយើងខ្ញុំដោយសង្ស័យថាលោក ផល្លី នេះអាចជាកូនប្រុសដែលបានបាត់ដំណឹង។ កម្មវិធីមនុស្សធម៌ «នេះមិនមែនជាសុបិន» បានស្វែងរកឃើញលោកឪពុកអ្នកម្ដាយ និងបងប្អូនចំនួន៧នាក់។
សូមទស្សនាវីដេអូជួបជុំរបស់លោក ផល្លី ដូចខាងក្រោម!
