លោកស្រី សៀក ម៉ាឡា ហៅ សំ សីលា មានលោកឪពុកឈ្មោះ សៀក អ្នកម្ដាយឈ្មោះ ស៊ន រឿន និងមានបងប្អូនចំនួន៤នាក់ គឺលោកស្រី សៀក ម៉ាឡា ជាកូនស្រីទី១ កូនទី២ឈ្មោះ សៀក សុខុន កូនទី៣ឈ្មោះ សៀក សុខា និងកូនទី៤ មិនទាន់ដាក់ឈ្មោះ ។ មុនឆ្នាំ១៩៧៥ គ្រួសាររបស់លោកស្រីប្រហែលជារស់នៅក្នុងខេត្តពោធិ៍សាត់។ ឆ្នាំ១៩៧៥ ប៉ុលពតបានជម្លៀសគ្រួសាររបស់លោកស្រីចេញពីស្រុកកំណើត។ លោកស្រីចាំបានថា លោកស្រីរស់នៅក្នុងកងកុមារ ចំណែកពូឈ្មោះ ស៊ន រុំ និងពូឈ្មោះ ស៊ន រ៉ាត់ ក៏នៅក្នុងកងកុមារជាមួយគ្នាដែរ ចំណែកឪពុកម្ដាយ និងប្អូនៗលោកស្រីនៅកន្លែងផ្សេង។
ឆ្នាំ១៩៧៦ ប៉ុលពតបានជម្លៀសគ្រួសាររបស់លោកស្រី ព្រមទាំងពូមីងបន្តទៀតទៅខេត្តកំពង់សោម។ លោកស្រី សៀក ម៉ាឡា និងពូ ស៊ន រុំ និងពូ ស៊ន រ៉ាត់ បានទៅនៅកងកុមារឯម្ដុំមាត់សមុទ្រ កំពង់សោម ចំណែកឪពុកម្ដាយ និងប្អូនៗរស់នៅកន្លែងផ្សេង។ ចាប់តាំងពីទៅនៅរស់នៅក្នុងកងកុមារ លោកស្រីបានបាត់ដំណឹងលោកឪពុកអ្នកម្ដាយ និងប្អូនៗ។
ឆ្នាំ១៩៧៩ ពេលទាហានចូលមករំដោះ អ្នកគ្រូឈ្មោះ សុខុន ដែលនៅកន្លែងកុមារនោះ បាននាំលោកស្រី និងក្មេងៗ៤-៥នាក់ ទៀតរត់ចេញពីកន្លែងបាញ់គ្នា និងបានរត់ទៅស្រុកកំណើតរបស់គាត់នៅខេត្តកំពង់ចាម។ ពេលបានពាក់កណ្ដាលផ្លូវ ប្ដីប្រពន្ធ២នាក់បានសុំលោកស្រី សៀក ម៉ាឡា ពីអ្នកគ្រូ សុខុន ទៅចិញ្ចឹម។ ចំណែកពូពីរនាក់ទៀត លោកស្រី សៀក ម៉ាឡាមិនដឹងថារត់ទៅទីណាទេនោះទេ។
កម្មវិធីមនុស្សធម៌ «នេះមិនមែនជាសុបិន» បានស្វែងរកឃើញពូទាំង២នាក់របស់លោកស្រី សៀក ម៉ាឡា ដែលបានបាត់ដំណឹងក្នុងឆ្នាំ១៩៧៩។
សូមទស្សនាវីដេអូជួបជុំរបស់លោកស្រី សៀក ម៉ាឡា ដូចខាងក្រោម!
