លោកស្រី មាស សាវ៉ាត មានឪពុកឈ្មោះ មាស សាវ៉ាន់ និងម្ដាយដើមឈ្មោះ ឡុង ស៊ីន និងមានអ្នកម្ដាយក្រោយឈ្មោះ ម៉ក់ រុង។ នៅឆ្នាំ ១៩៧៩ ពេលដែលប្រទេសត្រូវបានរំដោះ គ្រួសាររបស់លោកស្រីបាននាំគ្នាទៅរស់នៅជាយដែន។ ក្រោយមកនៅឆ្នាំ១៩៨០ ឪពុក និងម្ដាយចុងរបស់លោកស្រីបាននាំក្រុមគ្រួសារទាំងអស់ទៅរស់នៅជំរំស្រះកែវទី១ និងបាននាំគ្នាទៅរស់នៅជំរំស្រះកែវទី២។ នៅឆ្នាំ១៩៨២ គ្រួសាររបស់លោកស្រីបានផ្លាស់ទៅរស់នៅជំរំខៅអ៊ីដាង។ នៅឆ្នាំ ១៩៨៥ លោកស្រី មាស សាវ៉ាតបានរៀបការជាមួយលោក ពេជ្រ ពន្លក ហៅ រ៉ាន់។
នៅឆ្នាំ ១៩៩៣ លោកឪពុក អ្នកម្ដាយក្រោយ និងបងប្អូនត្រូវធ្វើមាតុភូមិនិវត្តន៍មកប្រទេសកម្ពុជាមុន ចំណែកលោកស្រី មាស សាវ៉ាត និងស្វាមីត្រូវធ្វើមាតុភូមិនិវត្តន៍មកក្រោយ។ លោកស្រីមិនបានដឹងថា ឪពុក និងម្ដាយ រួមជាមួយប្អូនៗ ទៅរស់នៅខេត្តកំពង់ឆ្នាំង ដែលជាស្រុកកំណើតខាងឪពុក ឬទៅរស់នៅខេត្តកំពត ដែលជាស្រុកកំណើតខាងម្ដាយចុងនោះទេ ហើយម្យ៉ាងលោកស្រី ក៏មិនបានស្គាល់ថាឪពុករស់នៅភូមិឃុំស្រុកអ្វីខេត្តកំពង់ឆ្នាំងនោះទេ។
ក្រុមការងារ នៃកម្មវិធីមនុស្សធម៌ «នេះមិនមែនជាសុបិន» បានស្វែងរកឃើញលោកឪពុក អ្នកម្ដាយ និងប្អូនៗ ដែលកំពុងតែរស់នៅក្នុងខេត្តកំពង់ឆ្នាំង។
សូមទស្សនាវីដេអូជួបជុំរបស់លោកស្រី មាស សាវ៉ាត ដូចខាងក្រោម!
