លោកស្រី មឿន ច្រឹប ហៅ មឿន យៀន មានអាយុ ៣៨ឆ្នាំ មានស្រុកកំណើតនៅភូមិទឹកឃ្លាំង ខេត្តកណ្ដាល។ លោកស្រីមានឪពុកឈ្មោះ មឿន និងម្ដាយឈ្មោះ ឡន។ លោកស្រីជាកូនទី៤ ក្នុងចំណោមបងប្អូនទាំងអស់ គឺបងស្រីទី១ ឈ្មោះ ឡាត់ បងស្រីទី២ ឈ្មោះ ផាត បងស្រីទី៣ ឈ្មោះ ផៃ ភេទស្រី និងប្អូនប្រុសទី៥ ឈ្មោះ ពៅ។
មុនឆ្នាំ១៩៧៥ គ្រួសាររបស់លោកស្រីរស់នៅក្នុងភូមិទឹកឃ្លាំង ខេត្តកណ្ដាល។ ឆ្នាំ១៩៧៥ ប៉ុលពតបានជម្លៀសគ្រួសាររបស់លោកស្រី និងម្ដាយមីងចេញពីស្រុកកំណើតនៅភូមិទឹកឃ្លាំង។ ឆ្នាំ១៩៧៨ ពេលល្ងាចក្នុងថ្ងៃមួយ លោកស្រី បងស្រីឈ្មោះ ឡាត់ និងម្ដាយមីង នាំគ្នាទៅដងទឹកនៅប្រឡាយមួយ និងបានងូតទឹកនៅទីនោះ។ ដល់ពេលងូតរួច ក៏ត្រឡប់មកផ្ទះវិញតែ នៅពេលដើរតាមផ្លូវបងស្រីឡាត់ បានប្រាប់ឲ្យលោកស្រីដើរឲ្យលឿនមកព្រោះមេឃជិតងងឹតហើយ ពេលនោះលោកស្រីបានប្រាប់បងស្រីវិញថា មិនបាច់ចាំទេព្រោះលោកស្រីស្គាល់ផ្លូវទៅផ្ទះវិញហើយ ឮអញ្ចឹងបងស្រី និងម្ដាយមីងបានដើរទៅផ្ទះមុនបាត់ទៅ។ ជាការសោកស្ដាយ លោកស្រី មឿន ច្រឹប បានបានព្យាយាមស្វែងរកផ្លូវត្រឡប់ទៅផ្ទះវិញ ប៉ុន្តែកាន់តែដើរ គឺកាន់តែវង្វេង។
លោកស្រី មឿន ច្រឹប បានដាក់ពាក្យកមស្វែងរកគ្រួសារក្នុងកម្មវិធីមនុស្សធម៌ «នេះមិនមែនជាសុបិន» ។ តាមការស្រាវជ្រាវ និងការប្រកាសដំណឹងស្វែងរកលើទូរទស្សន៍ និងវិទ្យុបាយ័ន ក្រុមការងារបានស្វែងរកឃើញអ្នកម្ដាយ និងបងប្អូនដែលនៅរស់។
សូមទស្សនាខ្សែវីដេអូជួបជុំរបស់លោកស្រី មឿន ច្រឹប ដូចខាងក្រោម!
