ថ្ងៃទី១៧ ខែមេសា ឆ្នាំ១៩៧៥ នៅទីក្រុងភ្នំពេញ ពួកប៉ុលពតបានជម្លៀសប្រជាជនចេញ។ ក្រុមគ្រួសាររបស់លោក សន សារឹម បានបែកគ្នា ដោយសារតែពួកគាត់នៅផ្ទះផ្សេងៗគ្នា។ ពេលនោះលោក សន សារឹម នៅផ្ទះជាមួយម្ដាយ និងឪពុក ព្រមទាំងប្រពន្ធគាត់ ដែលត្រូវជម្លៀសចេញពីទីក្រុងភ្នំពេញទៅនៅស្អាងព្រែកតូច។ បន្ទាប់មក ប្រពន្ធរបស់គាត់បានទៅរកម្ដាយ (ម្ដាយក្មេក) ពេលនោះគាត់ក៏បានបែកជាមួយប្រពន្ធគាត់ទៀត។ ចំណែកឪពុកម្ដាយរបស់គាត់បានស្លាប់ក្នុងពេលបន្តបន្ទាប់គ្នា។ នៅក្នុងរយៈពេល៣ឆ្នាំ ៨ខែ ២០ថ្ងៃ គឺរូបលោកមិនបានដឹងដំណឹងពីក្រុមគ្រួសារបងប្អូននោះទេ។ លោក សន សារឹម មានបងប្អូនចំនួន៤នាក់ គឺ លោកស្រី សន ស្រីថាន លោកស្រី សន ណារិន លោកស្រី សន សារុំ និងលោកស្រី សន ស្រីអឿន។
ក្រោយពេលប្រទេសបានរំដោះ លោកធ្លាប់បានដឹងដំណឹងប្អូនស្រីម្នាក់ថាមានគេឃើញនៅជំរំ និងនៅខេត្តសៀមរាប ប៉ុន្តែលោកមិនអាចស្វែងរកឃើញប្អូនរបស់លោកនោះទេ។ ក្រោយមក លោកបានដាក់ពាក្យមកស្វែងរកសាច់ញាតិក្នុងកម្មវិធីមនុស្សធម៌ «នេះមិនមែនជាសុបិន»។ កម្មវិធីបានសម្រេចផ្សព្វផ្សាយប្រកាសស្វែងរកសាច់ញាតិរបស់លោកតាមរយៈវិទ្យុបាយ័ន។ មួយសប្ដាហ៍ក្រោយមក កម្មវិធីបានទទួលបានការឆ្លើយតបពីលោកស្រី សន ស្រីអឿន ដែលកំពុងតែរស់នៅក្នុងភូមិព្រៃស្រូល ឃុំពោធិ៍អង្ក្រង ស្រុកបសែត ខេត្តកំពង់ស្ពឺ។ ក្រុមការងារមិនអាចស្វែងរកឃើញ លោកស្រី សន ស្រីថាន លោកស្រី សន ណារិន និងលោកស្រី សន សារុំបានឡើយ។
សូមទស្សនាវីដេអូជួបជុំលោក សន សារឹម ដូចខាងក្រោម!
