ជំនាន់លន់ ណុល ក្រុមគ្រួសារលោក សោម ព្រីង រស់នៅជួបជុំទាំងភរិយា ទាំងកូនៗ និង ឪពុកម្ដាយចិញ្ចឹម ដោយប្រកបរបរធ្វើស្រែចម្ការ។
ឆ្នាំ១៩៧៥ ពួកប៉ុលពត បានជម្លៀសលោក សោម ព្រីង ឲ្យទៅធ្វើជាកងចល័តនៅក្នុងស្រុកបាត់ប្រអប់ ខេត្តកំពង់ឆ្នាំង។
ឆ្នាំ១៩៧៧ ពួកប៉ុលពត បានជម្លៀសក្រុមគ្រួសារលោកស្រី សោម ចាន់ធឿន ឲ្យទៅធ្វើជាសហករ កងចល័ត និង កងកុមារ នៅស្រុករលាប្អៀរ ខេត្តកំពង់ឆ្នាំង។ លោកស្រី សោម ចាន់ធឿន បានសុំឲ្យម្ដាយមីងលោកស្រីជូនទៅជួបលោកឪពុក ។ បន្ទាប់មកលោកស្រី សោម ចាន់ធឿន បានទៅជាមួយម្ដាយមីងដើម្បីជួបលោកឪពុក គឺ លោក សោម ព្រីង ហើយលោកស្រីបានស្នាក់ជាមួយឪពុកបានចំនួន៣ យប់។
ក្រោយមកទៀតលោកស្រីមានការបារម្ភចំពោះម្ដាយ និង បងប្អូនក៏បានលាឪពុកវិលត្រលប់មករកម្ដាយវិញ។ចាប់តាំងពីពេលនោះមក មិនដែលបានឭដំណឹងលោកឪពុក សោម ព្រីង រហូតមកដល់សព្វថ្ងៃ។
កម្មវិធីមនុស្សធម៌ «នេះមិនមែនជាសុបិន» សូមប្រកាសស្វែងរកលោក សោម ព្រីង ដែលបានបែកគ្នាតាំងពីឆ្នាំ១៩៧៧។ ប្រសិនបើ លោក សោម ព្រីង បានឃើញការប្រកាសស្វែងរក ឬលោកអ្នកដែលបានដឹងដំណឹងនេះ សូមទាក់ទងមក កម្មវិធីមនុស្សធម៌ «នេះមិនមែនជាសុបិន» តាម រយៈទូរស័ព្ទលេខ ០៩៧៥ ០៩៧ ០៩៧។
កម្មវិធីមនុស្សធម៌ «នេះមិនមែនជាសុបិន» ផ្ដល់សេវាកម្ម ឥតគិតថ្លៃជូនប្រជាជនកម្ពុជាក្នុងការស្វែងរក សាច់ញាតិ ដែលបានបែកគ្នាក្នុងសម័យសង្គ្រាម ឬបានបែកគ្នាដោយសារមូលហេតុផ្សេងៗជាច្រើនទៀត នៅក្រោយសម័យសង្គ្រាម។ សូមទាក់ទងមកកម្មវិធីយើងខ្ញុំតាមទូរស័ព្ទលេខ ០៩៧៥ ០៩៧ ០៩៧ រៀងរាល់ម៉ោងធ្វើការ ចាប់ពីថ្ងៃច័ន្ទដល់ថ្ងៃសុក្រ វេលាម៉ោង៨ដល់១២ថ្ងៃត្រង់ និងម៉ោង២ដល់ម៉ោង៥ល្ងាច ឬមកទាក់ទងដោយផ្ទាល់នៅអគ្គនាយកដ្ឋានវិទ្យុ និងទូរទស្សន៍បាយ័ន៕
