មុនឆ្នាំ១៩៧៥ គ្រួសារលោក ឡុង ម៉ៅ រស់នៅជុំគ្នាទាំងអស់ក្នុងខេត្តកំពត ដោយប្រកបរបរធ្វើស្រែ។
ឆ្នាំ១៩៧៦ ប៉ុលពតបានជម្លៀស លោក ឡុង ម៉ៅ ទៅកោះអណ្ដែតដើម្បីធ្វើស្រែប្រាំង ឯកូនទាំងអស់រស់នៅជាមួយភរិយានៅស្រុកកំណើត។
ក្រោយមកនៅឆ្នំា១៩៧៧ គេបញ្ជូនលោក ឡុង ម៉ៅ ពីកោះអណ្ដែតមកបណ្ដុះស្រូវពូជនៅជិតផ្ទះដែលគ្រួសាររស់នៅវិញ។ លោក ឡុង ម៉ៅ តែងតែមកលេងប្រពន្ធកូនជាធម្មតា។
ឆ្នាំ១៩៧៩ ពេលដែលកងទ័ពចូលមករំដោះ លោក ឡុង ម៉ៅ បានរត់ចេញពីស្រុកកំណើតជាមួយប្រពន្ធ និងកូនៗ មកដល់អន្លង់ស្ពាន ជិតស្រុកអមលាំង ខេត្តកំពង់ស្ពឺ។ លោក ឡុង ម៉ៅ ព្រមទាំងប្រពន្ធកូនបានឈប់សម្រាក ៣ថ្ងៃនៅទីនោះ។ ពេលនោះមានទាហានខ្មែរក្រហមបានចាប់ក្មេងជាង២០០០នាក់ដាក់ឡាន រួមមានទាំងកូនលោក៣នាក់ដែលបានបាត់ខ្លួននោះផងដែរ ។ តាំងពីពេលនោះ លោក ឡុង ម៉ៅ បានបាត់ដំណឹងកូនទាំង៣នាក់រហូតមកដល់សព្វថ្ងៃ។
កម្មវិធីមនុស្សធម៌ «នេះមិនមែនជាសុបិន» សូមប្រកាសស្វែងរកលោក ជួប រិទ្ធី លោក ជួប សារ៉ែម និងលោកស្រី ជួប ស៊ីថុល ដែលបានបាត់ដំណឹងនៅឆ្នាំ១៩៧៩។ ប្រសិនបើ លោក ជួប រិទ្ធី លោក ជួប សារ៉ែម និងលោកស្រី ជួប ស៊ីថុល បានឃើញការប្រកាសស្វែងរក ឬលោកអ្នកដែលបានដឹងដំណឹងនេះ សូមទាក់ទងមក កម្មវិធីមនុស្សធម៌ «នេះមិនមែនជាសុបិន» តាម រយៈទូរស័ព្ទលេខ ០៩៧៥ ០៩៧ ០៩៧។
កម្មវិធីមនុស្សធម៌ «នេះមិនមែនជាសុបិន» ផ្ដល់សេវាកម្ម ឥតគិតថ្លៃជូនប្រជាជនកម្ពុជាក្នុងការស្វែងរក សាច់ញាតិ ដែលបានបែកគ្នាក្នុងសម័យសង្គ្រាម ឬបានបែកគ្នាដោយសារមូលហេតុផ្សេងៗជាច្រើនទៀត នៅក្រោយសម័យសង្គ្រាម។ សូមទាក់ទងមកកម្មវិធីយើងខ្ញុំតាមទូរស័ព្ទលេខ ០៩៧៥ ០៩៧ ០៩៧ រៀងរាល់ម៉ោងធ្វើការ ចាប់ពីថ្ងៃច័ន្ទដល់ថ្ងៃសុក្រ វេលាម៉ោង៨ដល់១២ថ្ងៃត្រង់ និងម៉ោង២ដល់ម៉ោង៥ល្ងាច ឬមកទាក់ទងដោយផ្ទាល់នៅអគ្គនាយកដ្ឋានវិទ្យុ និងទូរទស្សន៍បាយ័ន៕
