លោកស្រី មៀក ង៉ែត មានលោកឪពុកឈ្មោះ មៀក ខឿន អ្នកម្ដាយឈ្មោះ យឹម ហឿន និងមានបងប្អូនចំនួន៦នាក់។ បងទី១ឈ្មោះ មៀក ខៃ បងទី២ឈ្មោះ មៀក ច្រឹប បងទី៣ឈ្មោះ មៀក ហៀប លោកស្រី មៀក ង៉ែត ជាកូនទី៤ ប្អូនទី៥ឈ្មោះ មៀក អ៊ិត និងប្អូនទី៦ឈ្មោះ មៀក ឃួង។
ឆ្នាំ១៩៧៥ គ្រួសារលោកស្រី មៀក ង៉ែត មិនត្រូវបានជម្លៀសទៅណាទេ។ បងប្រុសទី១ មៀក ខៃ ត្រូវចូលក្នុងកងកុមារ។ ប៉ុលពតបានឲ្យបងប្រុសមើលគោពីរ ក្រោយមក មានអ្នករាយការណ៍ប្រាប់ប៉ុលពតថា លោក មៀក ខៃ ខ្ជិលមិនមើលថែគោនោះទេ។ ប៉ុលពតបានឲ្យគេយកបងប្រុស មៀក ខៃ យកទៅសម្លាប់ចោល ប៉ុន្តែត្រូវបានមីងនៅក្បែរនោះជួយ។ ក្រោយមក បងប្រុសបានប្រាប់ម្ដាយថា គាត់ភៀសខ្លួនទៅរស់នៅជាមួយពូនៅភ្នំឌិន ដើម្បីគេចពីការសម្លាប់។ តាំងពីពេលនោះមក លោកស្រី មៀក ង៉ែត ក៏បាត់ដំណឹងពីបងប្រុស មៀក ខៃ រហូតដល់សព្វថ្ងៃ។
កម្មវិធីមនុស្សធម៌ «នេះមិនមែនជាសុបិន» សូមប្រកាសស្វែងរកលោក មៀក ខៃ ដែលបានបែកគ្នានៅឆ្នាំ១៩៧៥។ ប្រសិនបើ លោក មៀក ខៃ បានឃើញការប្រកាសស្វែងរក ឬលោកអ្នកដែលបានដឹងដំណឹងនេះ សូមទាក់ទងមក កម្មវិធីមនុស្សធម៌ «នេះមិនមែនជាសុបិន» តាមរយៈទូរស័ព្ទលេខ ០៩៧៥ ០៩៧ ០៩៧។
កម្មវិធីមនុស្សធម៌ «នេះមិនមែនជាសុបិន» ផ្ដល់សេវាកម្ម ឥតគិតថ្លៃជូនប្រជាជនកម្ពុជាក្នុងការស្វែងរក សាច់ញាតិ ដែលបានបែកគ្នាក្នុងសម័យសង្គ្រាម ឬបានបែកគ្នាដោយសារមូលហេតុផ្សេងៗជាច្រើនទៀត នៅក្រោយសម័យសង្គ្រាម។ សូមទាក់ទងមកកម្មវិធីយើងខ្ញុំតាមទូរស័ព្ទលេខ ០៩៧៥ ០៩៧ ០៩៧ រៀងរាល់ម៉ោងធ្វើការ ចាប់ពីថ្ងៃច័ន្ទដល់ថ្ងៃសុក្រ វេលាម៉ោង៨ដល់១២ថ្ងៃត្រង់ និងម៉ោង២ដល់ម៉ោង៥ល្ងាច ឬមកទាក់ទងដោយផ្ទាល់នៅអគ្គនាយកដ្ឋានវិទ្យុ និងទូរទស្សន៍បាយ័ន៕
