លោក ម៉ឺន ផាន មានលោកឪពុកឈ្មោះ សួន ថេង អ្នកម្ដាយឈ្មោះ ច័ន្ទ សេម និងបងប្អូន៣នាក់។ បងប្រុសទី១ឈ្មោះ ម៉ឺន ឆុំ បងប្រុសទី២ឈ្មោះ ម៉ឺន ផន និងលោក ម៉ឺន ផាន ជាកូនទី៣។
ក្រោយពេលអ្នកម្ដាយទទួលមរណភាព និងដោយសារតែលោកឪពុកជាទាហាន ដែលមិនមានពេលវេលាគ្រប់គ្រាន់សម្រាប់មើលថែកូនៗនោះ បងប្អូនទាំងបីនាក់របស់លោកត្រូវរស់នៅបែកគ្នាដូចជា លោក ម៉ឺន ផាន ត្រូវទៅរស់នៅជាមួយឈ្មោះ អ៊ំ ឡុង ឯខេត្តពោធិ៍សាត់ ចំណែកបងប្រុសទី១ ម៉ឺន ឆុំ និងបងប្រុសទី២ ម៉ឺន ផន ត្រូវទៅរស់នៅជាមួយគ្រួសារគេផ្សេងនៅឯខេត្តបាត់ដំបង និងឯខេត្តពោធិ៍សាត់។
ក្នុងសម័យសង្គ្រាម លោក ម៉ឺន ផាន ត្រូវបានគេបញ្ជូនទៅធ្វើជាកងឈ្លបរហូតដល់ឆ្នាំ១៩៧៩។ លោក ម៉ឺន ផាន បានស្វែងរកឃើញលោកឪពុក បងប្រុសទី១ និងបងប្រុសទី២ និងបាននាំគ្នាទៅរស់នៅឯខេត្តពោធិ៍សាត់។ បងប្រុសទី២ ម៉ឺន ផន បានទៅរកស៊ីនៅស្រុកអូរជ្រៅដូចអ្នកភូមិដទៃទៀតដែរ ។ ក្រោយពេលចាកចេញទៅស្រុកអូរជ្រៅជាលើកទី៣ ក៏បានបាត់ដំណឹងបងប្រុសទី២ ម៉ឺន ផន មិនឃើញត្រឡប់មកផ្ទះវិញរហូតមកដល់បច្ចុប្បន្ន។
កម្មវិធីមនុស្សធម៌ «នេះមិនមែនជាសុបិន» សូមប្រកាសស្វែងរកលោក ម៉ឺន ផន ដែលបានបែកគ្នានៅឆ្នាំ១៩៧៩ ។ ប្រសិនបើ លោក ម៉ឺន ផន បានឃើញការប្រកាសស្វែងរក ឬលោកអ្នកដែលបានដឹងដំណឹងនេះ សូមទាក់ទងមក កម្មវិធីមនុស្សធម៌ «នេះមិនមែនជាសុបិន» តាមរយៈទូរស័ព្ទលេខ ០៩៧៥ ០៩៧ ០៩៧។
កម្មវិធីមនុស្សធម៌ «នេះមិនមែនជាសុបិន» ផ្ដល់សេវាកម្ម ឥតគិតថ្លៃជូនប្រជាជនកម្ពុជាក្នុងការស្វែងរក សាច់ញាតិ ដែលបានបែកគ្នាក្នុងសម័យសង្គ្រាម ឬបានបែកគ្នាដោយសារមូលហេតុផ្សេងៗជាច្រើនទៀត នៅក្រោយសម័យសង្គ្រាម។ សូមទាក់ទងមកកម្មវិធីយើងខ្ញុំតាមទូរស័ព្ទលេខ ០៩៧៥ ០៩៧ ០៩៧ រៀងរាល់ម៉ោងធ្វើការ ចាប់ពីថ្ងៃច័ន្ទដល់ថ្ងៃសុក្រ វេលាម៉ោង៨ដល់១២ថ្ងៃត្រង់ និងម៉ោង២ដល់ម៉ោង៥ល្ងាច ឬមកទាក់ទងដោយផ្ទាល់នៅអគ្គនាយកដ្ឋានវិទ្យុ និងទូរទស្សន៍បាយ័ន៕
