លោក តន់ ភោគ មានលោកឪពុកឈ្មោះ អែម ផន អ្នកម្ដាយឈ្មោះ សុំ សួន និងមានបងប្អូនចំនួន៦នាក់។ បងស្រីទី១ឈ្មោះ តន់ ល័យ បងប្រុសទី២ឈ្មោះ អែម ស៊ីវ៉ាន បងស្រីទី៣ឈ្មោះ តន់ ចន្ធូ លោក តន់ ភោគ ជាកូនទី៤ ប្អូនប្រុសទី៥ឈ្មោះ តន់ សម្បត្តិ និងប្អូនស្រីទី៦ឈ្មោះ ពៅ ហៅ រស់។
មុនឆ្នាំ១៩៧៥ គ្រួសារលោក តន់ ភោគ រស់នៅខេត្តកណ្ដាល។ លោកឪពុកជាកសិករ រីឯអ្នកម្ដាយជាអ្នកលក់ដូរផង និងជាកសិករផង ។ បងស្រីទី១ឈ្មោះ តន់ ល័យ មានស្វាមីឈ្មោះ បុត្រ ជាបុគ្គលិករោងកុនសុរិយា និងមានកូនចំនួន៣នាក់ គឺ ផល្លី ផល្លា និងម្នាក់ទៀតដែលលោកមិនចាំឈ្មោះ។
១៧ មេសា ១៩៧៥ ទាហានប៉ុលពតបានជម្លៀសគ្រួសារលោកចេញពីទីក្រុងភ្នំពេញ ទៅខេត្តពោធិ៍សាត់ដោយជិះឡាន។ ពេលទៅដល់ខេត្តពោធិ៍សាត់ ពួកប៉ុលពតបានឲ្យគ្រួសារលោករស់នៅម្ដុំវត្តភ្លៅមាន់ជាមួយប្រជាជនរាប់ពាន់នាក់។
ឆ្នាំ១៩៧៦ លោកឪពុកបានស្លាប់ដោយសារអត់អាហារ។ ក្រោយមក ខ្មែរក្រហមបានបំបែកលោក តន់ ភោគ និងប្អូនស្រីពៅឲ្យទៅរស់នៅក្នុងកងកុមារ ឆ្ងាយពីម្ដាយ និងបងៗ។ ប៉ុលពតបានសម្លាប់ប្អូនប្រុសទី៥ឈ្មោះ សម្បត្តិ និងបងៗដទៃទៀតជាបន្តបន្ទាប់ ដោយនៅសល់តែលោក តន់ ភោគ និងប្អូនស្រី ពៅ ហៅ រស់ប៉ុណ្ណោះ។
នៅឆ្នាំ១៩៧៨ ជិតចូលដល់ឆ្នាំ១៩៧៩ ប៉ុលពតបានជម្លៀសប្រជាជនឲ្យទៅភូមិប្រហោះក្បាល។ ក្នុងពេលធ្វើដំណើរ លោក តន់ ភោគបានជួបមីងសាច់ថ្លៃម្នាក់ឈ្មោះ សៅ សាឌី និងស្វាមីរបស់គាត់ និងបានបបួលបងប្អូនលោកទាំងពីរទៅរស់នៅជាមួយ ប៉ុន្តែអ្នកទាំងពីរមិនទៅជាមួយទេ។
ឆ្នាំ១៩៧៩ លោក តន់ ភោគ និងប្អូនស្រី ពៅ ហៅ រស់ រស់នៅក្នុងភូមិប្រហោះក្បាល។ ពេលនោះ ប្អូនស្រី ពៅ ហៅរស់ មានអាយុប្រហែលជា៩ឆ្នាំ។ ពួកប៉ុលពតបានឲ្យប្អូនស្រីទៅលើកទំនប់ជារៀងរាល់ថ្ងៃជាមួយស្រីម្នាក់ឈ្មោះ សួ ជាអ្នកភូមិចាស់ដែលរស់នៅក្នុងខេត្តពោធិ៍សាត់។ លោក តន់ ភោគ បានលួចរត់ជាមួយទាហានម្នាក់ និងបានផ្ដាំស្ត្រីឈ្មោះ សួ ឲ្យជួយថែរក្សាប្អូនស្រីផង ថ្ងៃក្រោយលោកនឹងមករកប្អូនស្រីនៅខេត្តពោធិ៍សាត់វិញ។ ចាប់តាំងពីពេលនោះមក លោក តន់ ភោគ បានបែកពីប្អូនស្រី ពៅ ហៅ រស់ រហូតមកដល់សព្វថ្ងៃ។
កម្មវិធីមនុស្សធម៌ «នេះមិនមែនជាសុបិន» សូមប្រកាសស្វែងរកលោកស្រី ពៅ ហៅ រស់ ដែលបានបែកគ្នានៅឆ្នាំ១៩៧៩។ ប្រសិនបើ លោកស្រី ពៅ ហៅ រស់ បានឃើញការប្រកាសស្វែងរក ឬលោកអ្នកដែលបានដឹងដំណឹងនេះ សូមទាក់ទងមក កម្មវិធីមនុស្សធម៌ «នេះមិនមែនជាសុបិន» តាម រយៈទូរស័ព្ទលេខ ០៩៧៥ ០៩៧ ០៩៧។
កម្មវិធីមនុស្សធម៌ «នេះមិនមែនជាសុបិន» ផ្ដល់សេវាកម្ម ឥតគិតថ្លៃជូនប្រជាជនកម្ពុជាក្នុងការស្វែងរក សាច់ញាតិ ដែលបានបែកគ្នាក្នុងសម័យសង្គ្រាម ឬបានបែកគ្នាដោយសារមូលហេតុផ្សេងៗជាច្រើនទៀត នៅក្រោយសម័យសង្គ្រាម។ សូមទាក់ទងមកកម្មវិធីយើងខ្ញុំតាមទូរស័ព្ទលេខ ០៩៧៥ ០៩៧ ០៩៧ រៀងរាល់ម៉ោងធ្វើការ ចាប់ពីថ្ងៃច័ន្ទដល់ថ្ងៃសុក្រ វេលាម៉ោង៨ដល់១២ថ្ងៃត្រង់ និងម៉ោង២ដល់ម៉ោង៥ល្ងាច ឬមកទាក់ទងដោយផ្ទាល់នៅអគ្គនាយកដ្ឋានវិទ្យុ និងទូរទស្សន៍បាយ័ន៕
